- No marco do acordo levaranse a cabo máis de 30 accións nos ámbitos do emprendemento, investimento, internacionalización, networking, Starup, pre-emprendedores e promoción de negocios
- Manuel Baltar afirma que é «unha alianza estratéxica que traerá máis dinamismo, coñecemento empresarial, riqueza e emprego á provincia de Ourense»
O presidente da Deputación de Ourense, Manuel Baltar e o presidente do Círculo de Empresarios de Galicia, Juan Güell, veñen de asinar un convenio de colaboración entre ámbalas dúas entidades para levar a cabo máis de 30 actuacións conxuntas na provincia de Ourense nos ámbitos do emprendemento e o investimento; desenvolvemento empresarial e Pemes; e promoción de negocios. «Esta colaboración público-privada supón «unha alianza estratéxica que traerá máis dinamismo, coñecemento empresarial, riqueza e emprego á provincia de Ourense», expresou Manuel Baltar.
O convenio permitirá desenvolver, entre outras, accións nos ámbitos Starup, agroalimentario (Galicia Market Place), organización de xornadas e encontros de networking empresarial, cooperación entre empresas, internacionalización de Pemes, talleres para pre-emprendedores, e foros de investimento. Os eixos fundamentais do acordo refírense a: emprendemento, para fomentar este ámbito e o investimento en Ourense, ademais de crear vías de colaboración e integración para axudar a construír un ecosistema galego potencial; desenvolvemento empresarial, con actividades para mellorar as oportunidades das pemes ourensás e facilitar o networking con outras rexións; e a promoción de negocios de Ourense, para difundir as oportunidades de negocios que ofrecen as empresas e os produtos ourensáns.
«Trátase dunha alianza estratéxica entre o goberno provincial e o Círculo de Empresarios de Galicia, no marco do Plan «Transforma Ourense», vencellado ao papel que exerce a Deputación de Ourense como axente dinamizador social e económico da provincia de Ourense para xerar, como administración pública, un espazo de oportunidades», destacou Manuel Baltar.
Precisamente, Baltar remarcou que froito do Plan «Transforma Ourense» a Deputación vén desenvolvendo iniciativas en colaboración con outras entidades, como o convenio con ABANCA, no marco do cal, nos últimos tres anos, «se puxo a disposición das familias, pemes e autónomos da provincia de Ourense uns 70 millóns de euros», e subliñou as alianzas da Deputación coa CEO e coa Cámara de Comercio de Ourense, e o acordo co Grupo de Investigación Governance and Economics research Network (GEN), que permitirá poñer en marcha un Observatorio Municipal de ámbito nacional e impulsar a investigación e divulgación referidas ao municipalismo. Tamén lembrou Baltar o acordo co Grupo Colmeiro, orientado ao sector turístico, agroalimentario e forestal, e o labor desenvolvido pola institución provincial na misión comercial USA-Ourense, celebrada en xuño do ano pasado.
Pola súa parte, Juan Güell dixo que esta é «a primeira vez que asinamos un convenio destas características, un acordo co que esperamos colaborar para impulsar proxectos de tipo tecnolóxico e atraer investidores á provincia de Ourense». Güell dixo que unha das principais misións do Círculo de Empresarios de Galicia «é promocionar a nova empresa nova, tentando que os proxectos conten non só con financiamento, senón tamén co impulso necesario noutros ámbitos empresariais».
